Fl-ewwel tliet xhur u nofs mill-inawgurazzjoni taċ-Ċentru tal-Viżitaturi taċ-Ċittadella mill-Prim Ministru nhar it-30 ta’ Ġunju 2016, 100,000 persuna żaret dan iċ-ċentru u sar wieħed mill-attrazzjonijiet prinċipali f’Għawdex.
Iċ-Ċentru għall-Viżitaturi jinsab qabel id-daħla taċ-Ċittadella f’żewġ ġibjuni tal-ilma mibnija lejn nofs is-seklu 19 f’parti mill-foss taċ-Ċittadella. Iċ-ċentru għall-viżitaturi huwa mgħammar b’teknoloġija awdjo-viżiva u jipprovdi faċilitajiet biex il-viżitaturi jsiru jafu dwar diversi aspetti tal-istorja taċ-Ċittadella.
Il-ħolqien taċ-Ċentru għall-Viżitaturi kien parti mill-proġett għall-Implimentazzjoni tar-Rakkomandazzjonijiet tal-Masterplan taċ-Ċittadella ko-finanzjat mill-Unjoni Ewropea permezz tal-Fondi ta’ Koeżjoni.
Il-Ministru għal Għawdex Anton Refalo żar iċ-ċentru fil-ġurnata li fih intlaħaq in-numru ta’ 100,000 viżitatur u rringrazzja lill-impjegati kollha li huma responsabbli mit-tmexxija taċ-Ċittadella u l-immanniġġjar taċ-Ċentru. Huwa qal li issa li l-proġett tar-restawr u riabilitazzjoni taċ-Ċittadella jinstab konkluż, eluf ta’ viżitaturi kuljum iżuru dan il-post u qegħdin jieħdu esperjenza aktar sabiħa taċ-Ċittadella. Huwa qal li l-Ministeru għal Għawdex huwa kommess li jibqa’ jagħti l-importanza kollha liċ-Ċittadella biex din tibqa’ tinżamm fil-kundizzjoni li tinsab bħalissa wara li ġew konklużi l-proġetti tar-restawr.
Dan l-aħħar iċ-Ċentru tal-Viżitaturi taċ-Ċittadella deher b’mod prominenti fl-AV Magazine, rivista ppubblikata f’Londra li tiffoka dwar l-aħħar żviluppi fil-qasam tat-teknoloġija tas-sistemi awdjo viżivi. Din is-sena l-istess Ċentru u l-Perit Martin Xuereb li ddisinnjah, ingħataw ukoll żewġ unuri mill-Malta Architect Awards. Dawn l-unuri wieħed għar-riabilitazzjoni u konservazzjoni ta’ post storiku u l-ieħor għall-binja pubblika, jirrikonoxxu l-aqwa disinni arkitettoriċi f’Malta bil-għan li jispiraw u jinfluwenzaw l-istakeholders ewlenin tal-industrija fil-gżejjer Maltin biex joħolqu strutturi li jsebbħu u mhux iħassru l-ambjent li jinsabu fih.
