10 snin ta’ miżuri favur kwalità ta’ ħajja aħjar, inkluż għal dawk vulnerabbli

Il-Ministeru għall-Politika Soċjali u d-Drittijiet tat-Tfal fakkar fl-investiment soċjali li qed isir biex tkompli titjieb il-kwalità tal-ħajja, mhux b’inqas ta’ dawk vulnerabbli. Dan filwaqt li ħa nota tal-kummenti li saru fil-pubblikazzjoni tal-Uffiċċju Nazzjonali tal-Verifika (l-NAO), tar-rapport ta’ awditjar intitolat ‘Ensuring fair non-contributory social benefits and safeguarding against related fraud’.

Il-Ministeru qal li r-rakkomandazzjonijiet li saru fir-rapport se jiġu kkunsidrati biex, skont u fejn meħtieġ, tittieħed azzjoni. Ir-rapport kellu l-għan li jistħarreġ l-operat tat-Taqsima tal-Osservanza tal-Benefiċċji.

Il-Ministeru qal li l-analiżi fir-rapport, li saret b’mod arbitrarju, iffukat fuq tip wieħed ta’ familja biex jinstab jekk id-dħul disponibbli ta’ din il-familja – li l-ebda wieħed mill-membri tagħha mhu f’qagħda li jaħdem – ikunx biżżejjed biex ilaħħqu mill-ħtiġiet bażiċi.

“Huwa magħruf sew li x-xibka ta’ ħarsien soċjali f’dawn l-aħħar snin issaħħet sew bil-varar ta’ riformi soċjali u titjib fil-benefiċċji bil-għan li tkun tista’ tilqa’ għal sfidi u għal aspirazzjonijiet li minn żmien għall-ieħor jinbidlu” qal il-Ministeru.

Fakkar li, flimkien ma’ miżuri maħsuba biex tissaħħaħ l-adegwatezza tal-pensjonijiet u l-assistenza għall-anzjani u għall-familji vulnerabbli, il-Gvern introduċa inizjattivi biex iħajru persuni jinqatgħu mid-dipendenza fuq il-benefiċċji soċjali u tad-diżimpjieg u jsibu mpjieg li jagħtihom sigurtà finanzjarja. Dawn l-inizjattivi għenu biex tonqos iż-żieda fil-benefiċjarji li, sal-2014 u l-2015, kienet dejjem qed tikber u wasslu biex eluf – l-aktar nisa u ġenituri waħedhom – mhux biss sabu impjieg iżda, aktar minn hekk, baqgħu fid-dinja tax-xogħol.

Il-Ministeru fakkar li l-iskop aħħari tas-sistema tal-benefiċċji mhux kontributorji, b’mod partikulari dawk li jiddependu minn test tal-mezzi, ċertament mhux li tipprovdi kumdità finanzjarja għal individwi li jistgħu jaħdmu bi qligħ jew li għandhom ġid sinifikanti. Għall-kuntrarju, dawn il-benefiċċji huma mmirati biex jagħtu sostenn lil familji bi dħul baxx u persuni li, bla ma jridu, qed jiddependu fuq il-ħarsien soċjali minħabba ċirkustanzi tal-ħajja, kundizzjonijiet ta’ saħħa jew diżabilità u li jxekkluhom li jsibu mpjieg. Għalhekk, f’dawn l-aħħar għaxar snin, tnedew miżuri u riformi bil-għan li jitkattar id-dħul tagħhom kif ukoll is-servizzi li jirċievu.

Dawn jinkludu riformi mfassla biex jgħinu aktar persuni b’diżabilità severa u dawk li jieħdu ħsieb qrabathom; il-ħlas sħiħ tal-COLA minflok żewġ terzi, kif kien isir lil benefiċjarji fuq l-assistenza soċjali; l-introduzzjoni tas-suppliment għal kull tifel u tifla flimkien maċ-children’s allowance li bejniethom żdiedu kważi €5 fil-ġimgħa għal kull wild; titjib sostanzjali fl-Allowance Supplimentari; u ż-żieda b’disa’ darbet tal-carers’ grant lil ġenituri li jieħdu ħsieb tfal b’diżabilità severa.

Barra minn hekk, is-sena l-oħra daħal fis-seħħ il-mekkaniżmu biex jitħallas sa massimu ta’ €1,200 lil familji bi dħul baxx biex jagħmel tajjeb għaż-żieda tal-għoli tal-ħajja.

Bħala riżultat tat-titjib u t-twessigħ tas-sistema soċjali, id-dħul disponibbli għal familji li jiddependu fuq l-assistenza soċjali kiber sew.